اردو کے معروف افسانہ نگار پروفیسر خالد جاوید 'پاکھی' کے ادبی اعزاز سے سر فراز
نئی دہلی ،14نومبر (ہماری دنیا بیورو )۔
جامعہ ملیہ اسلامیہ سے وابستہ اردو کے معروف ناول نگار اور افسانہ نگار پروفیسر خالد جاوید کو ہندی کی مقبول ادبی میگزین 'پاکھی' نے اعزاز سے سر فراز کیا ہے ۔یہ اعزاز ان کے ہندی میں ترجمہ شدہ ناول' موت کی کتاب' کے لئے دیا گیا ہے ۔پروفیسر خالد جاوید کویہ اعزاز نوئیڈا واقع اندرا گاندھی آرٹ سینٹر میں 'پاکھی' کی جانب سے منعقد دو روزہ تقریب میں دیا گیا ۔اس دوروزہ پروگرام کی آج افتتاحی تقریب تھی،جس میں 2016اور2017کے لئے ایوارڈ یافتگان کو سر فراز کیا گیاہے ۔' پاکھی' فیسٹیول میں ملک بھر سے متعدد زبانوں کے ادبا اور فنکار وں نے شرکت کی ۔
واضح رہے کہ پروفیسر خالد جاوید کا تعلق اتر پردیش کے بریلی سے ہے۔ فی الحال وہ جامعہ ملیہ اسلامیہ نئی دہلی میں ایسوسی ایٹ پروفیسر کے طور پر خدمات انجام دے رہے ہیں۔ ڈاکٹر خالد جاوید ادب کے مقبول جاسوسی ناول نگار ابن صفی کے ماہر مانے جاتے ہیں۔ وہ اپنی افسانوی تحریر و بیان کے لیے پاکستان اور ہندوستان دونوں ممالک میں یکساں طور پر مقبول ہیں۔
پروفیسر خالد جاوید کی متعدد کہانیاں غیر ملکی زبانوں میں بھی ترجمہ ہو چکی ہیں اور متعدد غیر ملکی یونیورسٹیوں میں تقابلی مطالعہ کے طور پر ادب کے طالب علم ان کی تخلیقات سے مستفید ہورہے ہیں۔وہ ہندی کے قارئین کے درمیان بھی بہت مقبول رہے ہیں۔ ان کی متعدد تخلیقات ہندی کے اہم ادبی رسالوں میں شائع ہوتی رہی ہیں اور قارئین اور ناقدین سے پذیرائی حاصل کر چکی ہیں۔ ہندی کے معروف ناول نگار نرمل ورما، گیان رنجن، اودے پرکاش اور یوگیندر آہوجا جیسی ادبی شخصیات بھی ان کہانیوں کے مداح رہے ہیں۔پروفیسر خالد جاوید کی معروف تصنیفات 'آخری دعوت' نعمت خانہ اور'موت کی کتاب' کو منفرد انداز اور داستان بیانیہ کے لیئے ادبی حلقوں سے بہت پزیرائی مل چکی ہے۔
