شادی ماتم میں تبدیل،سڑک حادثہ میں ایک ہی خاندان کے بجھ گئے چھ چراغ

ہماری دنیا بیورو

نوئیڈا، 11 نومبر۔ ایسٹرن پےریفرل ایکسپریس وے پر سائٹ -5 تھانہ علاقے میں ایک سڑک حادثے میں ایک ہی خاندان کے چھ افراد ہلاک ہوگئے اور سات افراد زخمی ہو گئے۔
ایس پی دیہات رن وجے سنگھ نے پیر کو بتایا کہ گزشتہ رات تھانہ سائٹ -5 میں ایسٹرن پےریفرل ایکسپریس وے پر ایک ماروتی ایکو وین میں ایک ہی خاندان کے 13 رکن ایک شادی کی تقریب میں شامل ہوکر بلبھ گڑھ (ہریانہ) سے ممیٹھا پور گلاوٹھی جا رہے تھے۔ اسی دوران ماروتی ایکو وین کو ایک نامعلوم گاڑی نے پیچھے سے ٹکر مار دی اور فرار ہو گیا۔ اس واقعہ میں وین کے ڈرائیور سمیت چھ افراد ہلاک ہوگئے اور سات افراد زخمی ہو گئے۔مہلوکین میں شمشیرہ (60)، یاسین (48)، شمائلہ (15)، شاکر (25)ریحانہ(18) اور 28 سالہ فرزانہ شامل ہیں۔ اس حادثے میں 84 سالہ فرحان، ریحان (16)، روبیان (5)، شبنم (38)، اقصیٰ (6)، مشرف (19) اور سدرہ (11) زخمی ہوئے ہیں۔سبھی لوگ بلند شہر کے میٹھا پور گلاوٹھی بلاک کے ہی رہنے والے ہیں اور آپس میں رشتہ دار ہیں۔ زخمیوں کو ایمس میں داخل کرایا گیا ہے۔ مفرور ڈرائیور کی تلاش کی جا رہی ہے۔