ہماری دنیا ڈیسک
لندن،05نومبر:دنیا کی اکثر آبادی کے نزدیک گمنام ایک ایسا ملک جو 2020تک شرح نموکے لحاظ سے دنیا کا سرفہرست ملک ہوگا۔آج ہم آپ کو ایک ایسے ملک کے بارے میں بتا نے جارہے ہیں۔ اس غریب اور چھوٹے ملک کی قسمت بدلنے کے قریب ہے۔ اس ملک کا نام جمہوریہ گیانا ہے جو براعظم جنوبی امریکہ کے شمالی ساحل پر واقع ہے۔ اس کی سرحدیں وینزویلا، سرینام اور برازیل سے ملتی ہیں۔ میڈیا رپورٹ کے مطابق بین الاقوامی مالیاتی فنڈ (آئی ایم ایف) نے ہفتے کے روز اپنی رپورٹ میں بتایا ہے کہ جنوبی امریکہ کا یہ چھوٹا سا ملک 2020 میںشرح نمو کے لحاظ سے دنیا میں سرفہرست ہو گا۔ آئندہ سال گیانا کی معیشت کی شرح نمو 86 فیصد ہو گا جو کہ چین کی آئندہ برس کی شرح نمو سے 14 گنا زیادہ ہے۔امید ہے کہ تیل کی آمدنی سے ملک کے خزانے میں 250 ارب ڈالر کی رقم آئے گی۔ گیانا کا ک ±ل رقبہ 2.15 لاکھ مربع کلو میٹر ہے۔ اس کی آبادی 7.8 لاکھ ہے جس میں ایک تہائی دارالحکومت میں رہتی ہے۔گیانا میں امریکی سفیرپیری ہولووے کے مطابق اس ملک کی مجموعی مقامی پیداوار کا حجم 4 ارب ڈالر ہے اور 2025 تک اس میں 300فیصد سے 1000 فیصد تک اضافہ متوقع ہے۔ اس موقع پر گیانا میں تیل کی یومیہ پیداوار 7.5 لاکھ بیرل ہو گی۔ اس طرح گیانا اس کرہ ارض کے نصف حصے کا دولت مند ترین ملک بن جائے گی۔
واضح رہے کہ گیانا پر بیرونی قرضوں کا حجم 2 ارب ڈالر ہے۔ البتہ گیانا کو مختلف قسم کے مسائل اور پیچیدگیوں کا سامنا ہے۔ ان میں اہم ترین بدعنوانی ہے جو ایک طویل عرصے سے ملک میں چھائی ہوئی ہے۔
گیانا جنوبی امریکہ کا واحد ایساملک ہے جس کے عوام انگریزی زبان میں بات کرتے ہیں۔ یہ برطانوی سامراج کے زیر تسلط رہا اور 1966 میں آزادی حاصل کی۔ گیانا میں آئندہ ماہ سے دریافت ہونے والے تیل کے ضخیم ذخائر کو نکالے جانے کا کام شروع ہوجائے گا۔ اس میں مرکزی ذمے داری امریکی کمپنی ایکشون موبائل کے پاس ہے۔ ایک اندازے کے مطابق گیانا میں تیل کے ذخائر 5.5 ارب بیرل سے زیادہ ہیں۔ ابھی تک وہاں تیل کی 12 فیلڈز دریافت ہو چکی ہیں۔
گیانا کی آبادی میں 55فیصد کا تعلق بھارت اور پاکستان سے ہے جب کہ 30فیصد افریقی نژاد ہیں۔ ملک میں غربت اور بے روزگاری کی شرح عروج پر ہے۔ اس کے علاوہ گیانا کو سرینام اور وینزویلا کی جانب سے سرحدی تنازعات کا بھی سامنا ہے۔ ان دونوں ممالک کا دعوی ہے کہ گیانا کی تین چوتھائی اراضی ان کی ہے۔گیانا میں قتل اور چوری کے جرائم کی شرح بھی بلند ہے۔ وینزویلا، کولمبیا اور برازیل کے بعد جرائم کی بلند شرح کے لحاظ سے گیانا کا چوتھا نمبر ہے۔ معیشت کے لحاظ سے دنیا بھر میں اس کا 161 واں نمبر ہے۔ گیانا میں صرف 10 غیر ملکی سفارت خانے اور ایک عرب ریستوران موجود ہے۔