ہماری دنیا بیورو
آگرہ، 18 نومبر۔ اتر پردیش کی یوگی حکومت نے اب تاج کی نگری آگرہ کا تاریخی نام تبدیل کرنے کی تیاری شروع کر دی ہے۔ آگرہ کا نام بدل کر اگرون ہونے کے امکانات ہیں۔ اس کی مکمل ذمہ داری حکومت نے ڈاکٹر بھیم راو امبیڈکر یونیورسٹی کو سونپی ہے جو یونیورسٹی کے شعبہ تاریخ سے ناموں سے متعلق اپنی تجویز بھیجی گی۔ ساتھ ہی شعبہ سے آگرہ کے نام سے متعلق ثبوت بھی مانگے گئے ہیں۔
اس سے پہلے حکومت نے کئی اضلاع اور اسٹیشن کے نام بدلے تھے۔ اس میں الہ آباد کو پریاگراج، فیض آباد کا نام بدل کر اجودھیا کیا گیا ہے۔ ان کے علاوہ مغل سرائے اسٹیشن کا نام بدل کر پنڈت دین دیال اپادھیائے جنکشن رکھا گیا تھا۔ اتنا ہی نہیں چندولی ضلع کا نام تبدیل کرنے کی رپورٹ انتظامیہ کو بھیجی جا چکی ہے، لیکن اب تک اس پر حکومت کے ذریعہ کوئی حکم نہیں ہوا ہے۔ ابھی حکومت تاج نگری کے طور پرجانے جانے والے آگرہ کا نام بدل کر اگرون کرنے کی کوششوں میں مصروف ہے۔ اگر آگرہ کا نام بدلا تو اس کو لے کر بھی دوسری سیاسی پارٹیاں حکومت کو گھیرنے کا کام کر سکتی ہیں، جیسے پہلے بھی ہو چکا ہے۔
