ہماری دنیا بیورو
جے پور،22نومبر: راجستھان میں مسلم پولس اہلکاروں کو داڑھی نہ رکھنے کاایک عجیب و غریب فرمان جاری کیا گیا ہے۔۔ الور پولس نے نو مسلم پولس اہلکاروں کو داڑھی رکھنے کی ملی اجازت کو واپس لینے کا حکم دیا ہے۔ اس حکم کے بعد جہاں مسلم تنظیمیں ناراض ہیں، وہیں ریاست کی کانگریس حکومت کو سمجھ نہیں آرہا ہے کہ وہ کیا کرے۔
یہ فرمان الور پولس کا ہے۔جس میں نو پولس اہلکاروں کا نام لکھا گیا ہے کہ انہیں داڑھی رکھنے کی ملی اجازت واپس لی جاتی ہے۔ اس حکم نامہ میں لکھا ہے کہ ان پولس اہلکاروں کو داڑھی رکھنے کی ملی اجازت فوری اثر سے منسوخ کی جاتی ہے۔ اس کی اطلاع سبھی پولس تھانوں کے بڑے افسروں کو بھیج دی گئی ہے۔
دراصل راجستھان میں یہ روایت ہے کہ اقلیتی طبقہ کے پولس اہلکاروں کو داڑھی رکھنے کیلئے ضلع سپرنٹینڈنٹ کو درخواست دینا پڑتا ہے۔ اس کے بعد یہ داڑھی رکھتے ہیں۔ الور ایس پی پاریس دیشمکھ کا کہنا ہے کہ قانون و انتظام کو بنائے رکھنے کے لئے ہم نے یہ حکم نامہ جاری کیا ہے۔ ہم نے 32 پولس اہلکاروں کو داڑھی رکھنے کی اجازت دے رکھی ہے جس میں نو اہلکاروں سے داڑھی رکھنے کی اجازت واپس لی گئی ہے۔ اس حکم نامہ سے جہاں مسلم پولس اہلکاروں میں بے چینی پائی جاتی ہے۔ وہیں مسلم تنظیموں کا کہنا ہے کہ حکومت اس حکم نامہ کو واپس لے ورنہ ہم عدالت کا دروازے کھٹکھٹائیں گے۔ ان کا کہنا ہے کہ سپریم کورٹ نے 1999 میں اقلیتی پولیس اہلکاروں کو داڑھی رکھنے کی اجازت دی تھی۔ راجستھان میں وزارت داخلہ کی زمہ داری خود وزیراعلی کے پاس ہے اس لئے وزرا کہہ رہے ہیں کہ اس بارے میں کوئی بیان وہی دیں گے۔
