ہماری دنیا بیورو
ممبئی،08نومبر:مہاراشٹر کے وزیراعلیٰ دیوبندر فڑنویس کے بیان پر ادھوٹھاکرے نے ان پر شدید حملہ بولا ہے۔فڑنویس کے بعد ادھو ٹھاکرے نے شیوسینا بھون میں پریس کانفرنس سے خطاب کیا۔ ادھو ٹھاکرے نے کہا کہ میں بالا صاحب کی طرح سچ کے ساتھ کھڑا ہوں۔ مجھ پر جھوٹ بولنے کے الزام لگ رہے ہیں۔ امت شاہ بات کرنے ممبئی آئے تھے۔ میں نے وزیراعلیٰ عہدے کو لے کر امت شاہ سے واضح طور پر بات کی تھی، سب کو پتہ ہے جھوٹ کون بول رہا ہے۔
ادھو ٹھاکرے نے کہا کہ دیویندر فڑنویس سے ایسے بیان کی توقع نہیں تھی۔ بی جے پی بھول گئی کہ دشینت چوٹالہ نے ان کے لئے کیا کہا تھا۔ شیوسینا جھوٹ بولنے والوں کی پارٹی نہیں ہے۔ ہم نے کبھی وزیراعظم نریندر مودی پر الزام نہیں لگائے۔ میں بی جے پی والا نہیں ہوں۔ جھوٹ نہیں بولتا، میں جھوٹ بولنے والوں سے بات نہیں کرتا، میں نے کبھی دشینت چوٹالہ جیسی زبان استعمال نہیں کیا۔
ادھو ٹھاکرے نے کہا کہ عہدوں اور وزیر اعلیٰ کے عہدے کو لے کر 50-50 پر اتفاق ہواتھا۔ مجھے اس پر صفائی دینے کی ضرورت نہیں۔ شیوسینا کا وزیراعلیٰ ہونے کے خواب کو پورا کرنے کے لئے مجھے کسی کی مدد کی ضرورت نہیں ہے۔ ہمارا کام بی جے پی جیسا نہیں۔ امت شاہ نے کہا تھا کہ جن کی زیادہ نشست ان کا وزیراعلیٰ۔ میں نے کہا کہ میں یہ نہیں مانوں گا۔ دیویندر فڑنویس نے امت شاہ کا حوالہ دے کر 2.5 سال کے لئے وزیراعلیٰ رہنے کی بات ہونے سے انکار کیا، عوام کو پتہ ہے کون جھوٹ بول رہا۔
دوسری جانب مرکزی وزیر نتن گڈکری نے کہا کہ اب بھی وقت ہے۔ مجھے لگتا ہے کہ لوگوں کی فلاح و بہبود کے لئے بی جے پی-شیوسینا کو مل کر حکومت بنانی چاہئے۔ جہاں تک 50-50 کے فارمولے کا سوال ہے، امت شاہ نے ایسا کوئی وعدہ نہیں کیا تھا۔
