ہماری دنیا بیورو
نئی دہلی: قومی ٹیم کے سابق کپتان سوربھ گانگولی جلد ہی اپنی نئی اننگ شروع کرنے جارہے ہیں۔ سوربھ گا نگولی بھارتی کرکٹ کنٹرول بورڈ (بی سی سی آئی) کے نئے صدر کے طور پر 23 اکتوبر کو اپنا عہدہ سنبھالنے والے ہیں۔ حالانکہ اس سے پہلے سوربھ گانگولی نے لوڈھا کمیٹی کی سفارشات کے مدنظر صاف کردیا ہے کہ ٹیم انڈیا کے کوچ روی شاستری سلیکشن کمیٹی کی میٹنگ میں حصہ نہیں لیں گے۔
بنگلہ دیش سیریز کے لئے قومی ٹیم کا سلیکشن 21 اکتوبر کو ہونا تھا،لیکن اس کی تاریخ میں تبدیلی کی گئی ہے،اب ٹیم کا سلیکشن 24 اکتوبر کو ہوگا۔ وہیں 23 اکتوبر کو سوربھ گانگولی بی سی سی آئی کے صدر کی کرسی سنبھالیں گے۔ حالاں کہ وہ انتخابی کمیٹی کی میٹنگ میں حصہ نہیں لے سکتے ہیں۔ ایسے میں وہ کمیٹی کی میٹنگ سے پہلے اراکین سے بات کرسکتے ہیں۔
قومی ٹیم کے انتخاب کے دوران کمیٹی کے رکن، بورڈ کے سکریٹری اور ٹیم کے کپتان وراٹ کوہلی موجود رہیں گے لیکن کوچ روی شاستری کی نو انٹری رہے گی۔ قیاس لگائے جارہے ہیں کہ سوربھ گانگولی کے آنے سے کرکٹ میں غیر یقینی کی صورتحال ختم ہوگی۔ گزشتہ تین چار سال سے گھریلو کرکٹ نہیں کھیلنے پر کوئی جوابدہی نہیں تھی،لیکن شاید اب ایسا کرنے پرہر کھلاڑی کو جواب دینا ہوگا۔
