ہماری دنیا بیورو
غازی آباد:غازی آباد میں وزارت دفاع کے تحت آنے والی آرڈینینس فیکٹری کے باہرمنگل کو دو بدمعاشوں نے ایک نوجوان کو رام رام بولا اور پانچ گولیاں ماردیں۔ اس کے بعد بدمعاش موقع سے فرار ہوگئے۔ آرڈینینس فیکٹری کے باہر ہوئی اس واردات سے پولس کی کارکردگی پر سوال اٹھ رہے ہیں۔ اب یہاں کی سیکورٹی میں اضافی کردیا گیا ہے۔
غازی آباد کے مرادنگر کے رہنے والے گورو کا دو بدمعاشوں نے قتل کردیا۔ آرڈینینس فیکٹری کے پاس سے منگل کی شام کو وہ اپنے گھر جارہا تھا۔ اسی دوران دو بدمعاشوں نے اسے روکا اور پہلے رام رام بولا اور پھر اندھا دھند گولیاں چلادیں۔ ایک کے بعد ایک پانچ گولیاں گورو کے سینے میں ماری گئیں۔ گورو کی موقع پر ہی موت ہوگئی۔مراد نگر کے گاؤں چروڑا میں اس وقت ماتم چھا گیا جب ایک ںائک پر گھر سے نکلے گورو پر گولیوں کی برسات کرکے موت کے گھاٹ اتار دیا گیا۔ وہ اپنے گاؤں سے اپنی دوکان پر جارہاتھا۔مہلوک کے گھر والوں کا کہنا ہے کہ گاؤں کے ہی ککی سے جھگڑا ہوگیا تھا۔ مہلوک کے بھائی اتل کے مطابق جب وہ موقع پر پہنچا تو وہاں موجود لوگوں نے بتایا کہ اسی کے گاؤں کے ککی نام کے نوجوان نے قتل کیا ہے۔
آپ کو بتا دیں کہ آرڈیننس فیکٹری وزارت دفاع کے تحت آتی ہے اور یہاں پر پہلے سے کافی سیکورٹی کا دعویٰ کیا جاتارہا ہے۔ اس کے باوجود یہاں سے بدمعاش واردات کو انجام دے کر فرار ہوگئے جس سے قانون وانتظام پر سوال اٹھ رہے ہیں۔ وہیں، ایس ایس پی غازی آباد سدھیر کمار کا کہنا ہے کہ واقعہ کے بعد آرڈیننس فیکٹری کے باہر سیکورٹی میں اضافہ کیا جا رہا ہے۔ معاملے کی تحقیقات کی جا رہی ہے۔ اس معاملے میں باہمی رنجش کا معاملہ نکل کر سامنے آ رہا ہے۔پولیس کا کہنا ہے کہ گاؤں کے ہی لوگوں کے ذریعہ ہی قتل کرنے کی بات کہی جا رہی ہے، جیسے ہی خاندان کے لوگ رپورٹ درج کرائیں گے، ملزمان کو گرفتار کیا جائے گا۔ وہیں، پولیس سے جب آرڈیننس فیکٹری کی سیکورٹی کے بارے میں سوال کیا گیا تو ان کا کہنا ہے کہ اب اس گیٹ کی سیکورٹی پرتوجہ بھی دیا جائے گا کیونکہ پہلے گاؤں کے لوگ اس دروازے سے آیا جایا کرتے تھے مگر تہوار پر ملے ان پٹ کے بعد اس گیٹ کی سیکورٹی بھی بڑھا دی گئی ہے۔
واضح رہے کہ اس وقت اترپردیش میں قانون وانتظام کی صورتحال کافی خراب ہے، اور جرائم میں کافی اضافہ ہوگیا ہے۔ ابھی کچھ دن پہلے ہی راجدھانی لکھنؤ میں شدت پسند لیڈر کملیش تیواری کا بھی دوبدمعاشوں نے اس کے گھر میں جاکر چاقوسے گلا ریت کر قتل کردیا تھا۔جس کے بعد سے کافی ہنگامہ مچا ہوا ہے۔اپوزیشن پارٹیاں بھی اترپردیش کے وزیراعلیٰ یوگی آدتیہ ناتھ کو تنقید کا نشانہ بنارہی ہے۔
قابل ذکر ہے کہ نیشنل کرائم ریکارڈ بیورو(این سی آر بی) کے ذریعہ جاری اعدادوشمار میں مجرمانہ معاملات میں اترپردیش کو پورے ملک میں سرفہرست بتایا گیا ہے۔2017 میں جاری اعدادوشمار کے مطابق پورے ملک میں خواتین ہراسانی کے 14 فیصدے معاملے تنہایو پی میں ہوتے ہیں۔
